- Vearrodieđáhus sáddejuvvo gaskal njukčamánu 7.b. ja njukčamánu 22.b. Buohkat eai oaččo vearrodieđáhusa oktanaga. Don oaččut dieđu go du vearrodieđáhus lea gárvvis, ja it dárbbaš čálihit sisa skatteetaten.no neahttasiidui ovdal go oaččut dieđu, dadjá vearrodirektevra Nina Schanke Funnemark.    

 Vaikke Vearroetáhta lea viežžan ja ovddalgihtii deavddán olu dieđuid, de lea ain du ovddasvástádus gárvvistit vearrodieđáhusa.    

- Vearroetáhtas leat olu dieđut, muhto mii eat dieđe buot. Sáhttet leat boasttuvuođat dahje váilevašvuođat vearrodieđáhusas maid ieš fertet muddet. Danin fertet dárkkistit ahte dieđut vearrodieđáhusas leat riekta, ja vejolaččat njulget boasttuvuođaid ovdal go máhcahat, dadjá Schanke Funnemark.    

7 juohke 10 dáidet oaččut ruđaid buorrin vearus   

Gaskaboddosaš logut čájehit ahte 2,7 miljovnna olbmo dáidet oaččut vearu buorrin. Gaskamearálaččat de mielddisbuktá dát 17 200 ruvnno juohke olbmui, ja oktiibuot 46,1 miljárdda ruvnno.   

1 200 000 dáidet oaččut bázahusvearu, oktiibuot 40,4 miljárda ruvdnui. Gaskamearálaččat 34 500 ruvnno juohke olbmui.    

Diibmá de ožžo 2,9 miljovnnas gaskamearálaččat 15 400 ruvnno buorrin, ja 900 000 olbmo fertejedje máksit ruovttoluotta gaskamearalaččat 29 900 ruvnno.    

Sáhttá leat gánnáhahtti dárkkistit 

Diibmá vearrodieđáhusa ja vearrorehketdoalu logut čájehit ahte ollugat sáhttet dinet jus dárkkistit vearrodieđáhusa. Go vearrodieđáhus sáddejuvvui njukčamánus 2023:s, de ožžo 2,9 miljovnna buorrin vearus. Maŋŋil go vearrodieđáhus lei meannuduvvon ja vearrorehketdoallu sáddejuvvui, de lassánii lohku 3,2 miljovdnii.    

Seamma láhkai unnui oassi geaiguin lei bázahusvearru maŋŋil go vearrorehketdoallu lei gárvvis. Go vearrodieđáhus sáddejuvvui, de ledje 900 000 olbmuin bázahusvearru. Maŋŋil go vearrodieđáhus gieđahallojuvvui de ledje dušše 740.000 olbmos bázahusvearru. 

Logut čájehit ahte go olbmot rievdadit vearrodieđáhusa de leat máksán unnit vearu. Dát sáhttá omd. leat ahte sii leat deavdán dieđuid mat eai lean ovddalgihtii devdojuvvon, dahje sii leat rievdadan eará dieđuid vearrodieđáhusas.  

Dán berret dárkkistit:  

• Dieđut sisaboađu, opmodaga, ásodaga ja loana birra leat ovddalgihtii devdojuvvon du vearrodieđáhusas. Dárkkis ahte logut leat riekta.    
• Leat go eahpesihkar lea go dus riekti gessosii? Geavat geasusbagadusa skatteetaten.no/fradragsveileder  
• Leat go vuovdán dahje laigohan earáide ásodaga? Soaitá ahte dát lea vearrogeatnegas, ja dus lea riekti gessosii. Loga eanet skatteetaten.no/bolig neahttasiiddus.   
• Lea go juoga mii váilo? Fertet ieš lasihit omd. kryptovaluhta, loana olgoriikkas ja priváhta loanaid.    

Ođas dán jagi 

Dán jagi juhkkojuvvojit loanat ja reanttut dássálaga vearrodieđáhusas sin gaska geas lea loatna. Dát mearkkaša ahte jus dus ja du náittosguoimmis dahje ovttasássis leat viessoloatna fárrolaga, de lea loatna juhkkojuvvon 50 prosentii goappašat vearrodieđáhussii. Jus lehpet golmmas geain lea loatna fárrolaga, de oažžubehtet 33,3 proseantta ja nu ain. Seamma guoská reanttuide. Sáhttibehtet ieža rievdadit juohkima jus lea boastut. 

Buohkain geain lea loatna earáin, berrejit iskat leago juohkin riekta vearrodieđáhusas. Jus dis galgá leat eará juohkin, de sáhttibehtet ieža rievdadit. Ehpet galgga rievdadit loana dahje reanttuid, muhto oasi loanas ja reanttuin (proseanttas). Buohkat geat leat vásttolaččat lotnii fertejit de rievdadit sin oasi vearrodieđáhusas, nu ahte oktiibuot lea 100 proseantta. 

Muhtumat leat ožžon veahkki beassat viessomárkanii iežas vánhemiin. Jus váhnen lea miellonejeaddji, de ožžot loana iežas vearrodieđáhussii. Jus vánhemat eai galgga oaččut loana vearrodieđáhussii, de sáhttet rievdadit iežas oasi nulla prosentii.    

Gávnnat eanet dieđuid loana ja reanttuid juohkima birra skatteetaten.no/medlantaker neahttasiiddus.  

Goas máksojit vearroruđat? 

Eatnašat ožžot vearrorehketdoalu ovdal suoidnemánu, earát fertejit vuordit čakčii. Don oaččut dieđu go du vearrorehketdoallu lea gárvvis.   

Jus don it máhcat vearrodieđáhusa áigemearrái, dahje don leat ožžon bázahusvearu, de oaččut vearrorehketdoalu áramusat geassemánus. Náittosguoimmit ožžot vearrorehketdoalu oktanaga, nu ahte jus du náittosguoibmi ii máhcat dahje oaččo bázahusvearu, de oaččut don vearrorehketdoalu áramusat geassemánus.    

Mii eat sáhte vástidit goas du vearrorehketdoallu lea gárvvis, iige telefovdna dahje eará kanála bokte. Don oaččut dieđu e-poastta dahje SMSa bokte go du vearrorehketdoallu lea gárvvis.  

 

– Sáhttet leat iešguđet sivat manne muhtimat ožžot vearrorehketdoalu maŋŋelis go earát. Muhto mii eat sáhte muitalit manne juste don it leat vel ožžon iežat vearrorehketdoalu. Sáhttá omd. leat ahte dus lea moalkás vearrodieđáhus dahje don leat váldon dárkkisteapmái, dadjá Nina Schanke Funnemark.    

Jus don oaččut bázahusvearu, de it dárbbaš máksit ovdal maŋŋil geasi. Oaččut rehkega buori áiggis ovdal máksináigemeari.    

Loga eanet vearrorehketdoalu birra dás:  https://www.skatteetaten.no/person/skatt/skatteoppgjor/se-skatteoppgjoret-ditt/ 

Praktihkalaš dieđut vearrodieđáhusa birra 

Vearrodieđáhus sáddejuvvo iešguđet beivviin gaskal njukčamánu 7.b. ja 22.b. Mii dieđihat dutnje e-poastta dahje SMSa bokte go du vearrodieđáhus lea gárvvis. Vearrodieđáhus báhpira bokte sáddejuvvo maiddái gaskal njukčamánu 7.b. ja 22.b.   

 Vaikke don oaččut vearrodieđáhusa báhpira bokte, de sáhtát lihká čálihit sisa skatteetaten.no neahttasiiddu bokte, geahčat ja máhcahit iežat vearrodieđáhusa.    

Jus dus leat gažaldagat vearrodieđáhusa birra, válde oktavuođa minguinskatteetaten.no/kontakt neahttasiiddu bokte. Gávnnat maiddái ođasmahttojuvvon dieđuid ja bagadusa skatteetaten.no neahttasiiddus.   

Máhcahanáigemearri lea nugo dábálaččat: cuoŋománu 30.b. bargiide ja pensionisttaide, ja miessemánu 31.b. ealáhusdolliide.  

Dehálaš olahus ealáhusdoibmii 

Dán jagi galget buot norgga fitnodagat, sullii 400 000, máhcahit ođđa vearrodieđáhusa. Ođđa vearrodieđáhusa ealáhusdoaimmas lea almmuhuvvon ceahkkálaga daid maŋimuš njealje jagi. Fitnodagat fertejit deavddit ja sáddet vearrodieđáhusa/fitnodatdieđáhusa ja ealáhusspesifikašuvnna rehketdoallovuogádaga dahje jahkečielggadanpopgrámma bokte.   

Jus dus lea ovttaolbmofitnodat, de sáhttet eanaš gerddiid máhcahit vearrodieđáhusa rehketdoallovuogádaga dahje jahkečielggadanprográmma haga. Buot ealáhusdoallit geain lea ovttaolbmofitnodat ožžot vearrodieđáhusa njukčamánus. 

Ođđa vearrodieđáhus maiddái mielddisbuktá ahte lagabui 60 skovi, oktiibuot 6 500 ruvttot oalát jávket. Dál ii leat šat vejolaš geavahit boares skoviid Altinnas.